زبائن من نوع آخر
عربيات الأكل زباينها أكتر والإختلافات بينها وبين زباين المطعم العادي كتيرة، بس بتشد الشباب والأعمار الصغيرة أكتر أو أى حد بيدور على أكل عملي وسريع ومش مكلف. كشيف تقدر تستغل النوع دة من الزباين لأنهم بيحبوا يجربوا كل ما هو جديد أو غير تقليدي و تقدملهم أطباق جديدة ومختلفة.
قانونية 100%
مع كثرة ظهور عربيات الأكل في الشارع، بدأ طرح قانون جديد في البرلمان المصري لتقنين وضع العريات دي عشان تقدر تمارس وظيفتها بسهولة في إطار قانوني 100%. من دلوقتي تقدر تعتبر شوارع المدينة ساحة جديدة لإبتكاراتك و تقدم فيها الأطباق المختلفة في تجربة أكل شارع جديدة.
إمكانية التنقل ساحرة
مش لازم تفضل في مكان ثابت طول السنة. في الصيف إنقل مكانك للساحل، ممكن كان الجونة بين الفصول أو أى مكان هتكون عارف و متأكد إن زباينك اللي بيحبوك هيكونوا موجودين فيه. وهنا دور السوشيال ميديا هيبان كعامل رئيسي تقدر تتواصل بيه مع كل الناس و تعرفهم مكان وجودك فين.
إستلهم من قصص الآخرين
إحنا متابعين قصص نجاح عربيات أكل كتيرة و ناجحة من سنين، كل أسبوع تقريبًا بيظهر عربية جديدة أو عربية بتطور من نفسها. وانت كشيف خد الإلهام من عربيات الأكل اللي فرضت نفسها على ساحة الأكل في مصر. شوكس برجر على سبيل المثال بدأوا بموقع واحد في القاهرة الجديدة، ثم مدينة نصر، وأعلنوا مؤخرًا عن أول مطعم للوجبات الجاهزة في مصر الجديدة. جارنل سوشي مثال تاني اللي بدأ رحلته بعجلة إسمها "سوشي بايك" في القاهرة الجديدة ثم أطلقوا علامتهم التجارية مع فروع متعددة ناجحة واحدة تلو الأخرى. ومثال ثالث للنجاح و التوسع برجر تراك اللي بقت موجودة دلوقتي في شرق و غرب القاهرة والجونة ودلوقتي بقت تعتبر من أهم الأماكن اللي بتقدم برجر في الساحل الشمالي.
